Rusiya Türkiyədə AES-i bu qiymətə tikir: Nəhəng rəqəm açıqlandı
Türkiyədə Akkuyu AES-in tikintisinin dəyəri cari qiymətlərlə 24-25 milyard dollar təşkil edir.
Musavat.com xəbər verir ki, bu məlumatı Rusiyanın “Rosatom” şirkətinin baş direktoru Aleksey Lixaçev bu gün Elm və Təhsil Şurasının iclasında açıqlayıb.
Onun sözlərinə görə, Rosatom hazırda tikintinin özünü maliyyələşdirir. Lixaçev həmçinin qeyd edib ki, dövlət korporasiyası hazırda xaricdə 22 enerji bloku tikir, ümumilikdə 39 obyektlə müqavilə bağlanıb. Ölkə daxilində yeddi enerji bloku tikilir.
Rosatom Mersin vilayətində Türkiyənin ilk atom elektrik stansiyası olan Akkuyunu inşa edir. Stansiya hər birinin gücü 1200 MVt olan dörd enerji blokundan ibarət olacaq. AES-in fiziki işə salınması 2024-cü ilə planlaşdırılır. Əvvəllər bildirilib ki, Türkiyə daha iki AES-in – Sinop və Trakya əyalətlərində tikintisi üzrə layihələri nəzərdən keçirir.
Atomexpo 2024 sərgisində Türkiyənin energetika naziri Alparslan Bayraktar ölkəsinin Sinop və Trakyada yeni atom elektrik stansiyalarını kiminlə inşa edəcəyinin tezliklə aydınlaşacağını bildirib. Onun sözlərinə görə, Türkiyə Sinopdakı atom elektrik stansiyası layihəsinin inkişafında ciddi irəliləyiş əldə edib. Rosatom və digər maraqlı tərəflərlə dialoq davam edir.
