ABŞ gələn il Azərbaycanla minatəmizləmə və terrorizmlə mübarizə sahəsində əməkdaşlıq etməyəcək?
Bayden administrasiyası 2025-ci il büdcəsində Azərbaycana ayrılan vəsaitin həcmini azaldıb.
Bununla bağlı məlumatı dövlət katibinin müavini Riç Verma jurnalistlərə təqdim edib: “ABŞ hökuməti hər iki ölkə üçün prioritet olan bəzi əsas sahələrdə Azərbaycanla əməkdaşlıq edir. Azərbaycan üçün 2025-ci maliyyə ili sorğusuna inklüziv iqtisadi artım və ticarətin genişləndirilməsi, ingilis dilinin öyrənilməsi imkanları, vətəndaş cəmiyyəti və müstəqil media, həmçinin insan haqları təşkilatları, regionda dialoq və etimadın təşviqi üçün tədbirlər daxildir”.
Administrasiya Azərbaycana ikitərəfli yardım üçün təxminən 12,5 milyon dollar tələb edib ki, bu da ötən illə müqayisədə 2 milyon dollar azdır. Bu, nüvə silahının yayılmaması, terrorizmlə mübarizə və ərazilərin minalardan təmizlənməsini təşviq edən proqramların təklifə daxil edilməməsi ilə bağlıdır.
Maliyyələşdirmənin azalmasının 907-ci düzəlişlə bağlı olub-olmadığına dair suala Verma dəqiq cavab verməsə də, onun qüvvədə qaldığını təsdiqləyib.
